Example Post Template يسلم مخ اللى كتبه
الظاهرة دي موجودة في بنات اليومين دول و تقريبا المشاكل بتزيد و نسب الطلاق بتزيد بسبب النقطة دي
من غير لف ولا دوران ....في كتير من البنات دلوقتي..... السوفت وير بتاعها نازل من غير الفايل بتاع ( طاعة الزوج) .
البنت دي معترفة أن أي منظومة في الدنيا لازم يكون ليها قائد ... والقائد ده بيتسمع كلامه (طبعا في ظل أسس مؤسسية معينه) ... ومعترفة أن أي مركب لازم يكون ليها ريس...ما عدا البيت ....هي شايفة انها مش لازم تسمع كلام حد.... وانها ماينفعش تعمل أي حاجة من غير ما تكون مقتنعة .... رغم انها بتسمع كلام مديرها في الشغل عادي حتي لو هي مش مقتنعة لان ده طبيعي في العمل المؤسسي ...بس جوزها لا.
لدرجة اني كنت فى ندوه عن إدارة المشاكل الزوجية.... وكنت بقول ان لو الراجل ومراته إختلفوا علي حاجة وهما بره البيت فالتصرف السليم أن الزوجة تحترم رغبة زوجها في اللحظة دي (حتي لو مش مقتنعة) ولما يرجعوا البيت يبقوا يتناقشوا في الموضوع لحد ما يوصلوا لاتفاق مرضي للطرفين..... راحت بنت سألتني (طب ليه انا اللي اسمع كلامه مش هو اللي يسمع كلامي ؟!!)
انا شوفت فيديو لبرنامج المذيعات فيه مصريات....كانوا مستضيفين ست سورية ...الست السورية بتتكلم أنها اتربت علي طاعة الزوج.... يعني بتسمع كلام زوجها وانها لازم تحترمه... وبتختار الكلام اللي بتقولهوله احتراما ليه... وانها لازم تميزه وهي بتوزع الاكل😍 ...وانها لازم توفرله سبل الراحة لما يرجع م الشغل....المذيعات كانوا مستغربينها جدا وكانوا هايقوموا ياكلوها 😁
الشريحة دي من البنات نشأت لاسباب مختلفة ...منها... انها ممكن تكون اتربت في بيت الام هي اللي كانت مسيطرة علي البيت....او لانها تأثرت بالافكار بتاعة رابطة الاسترونج اندبندنت وومن...او شعورها بالاستقلال المادي حسسها انها زيها زيه وانه مالوش عليها حق الطاعة. .
واللي ساعد علي كده ظهور رجالة غير حاملي المسئولية فالست بتضطر تاخد مكانه.
البنت دي هتلاقي قاموس اللغة بتاعتها مليان بكلمة ( لأ .... انت مالك.....مش مقتنعة.....قوم إنت إعمل كذا هو انت صغير؟..... انا حرة....انا كده واذا كان عاجبك..... الخ)
طبعا الطاعة دي مش مطلقة وليها مفهوم وضوابط ....وطبعا ما انكرش أن في رجالة مستبدين .... وانهم بيسيئوا استخدام حق الطاعة ....لكن ده مش معناه اننا نهدم المبدأ من الأساس.
في الحياة الزوجية .....الزوجة واجب عليها الطاعة بالمنطق المؤسسي وبالادلة الشرعية ....زي ما الزوج واجب عليه الرفق والرحمة بمن هم تحته....أي طرف بيتخلي عن واجباته ...البيت بيحصله خلل رهيب
انت كشاب مقبل علي الجواز....لو لقيت البنت اللي بتفكر ترتبط بيها بتنكر طاعة الزوج ومش معترفة بالقصة دي.....أخلع قولا واحدا.
قال صلى الله عليه وسلم: ألا أخبرك بخير ما يكتنز المرء؟ المرأة الصالحة؛ إذا نظر إليها سرته، وإذا أمرها أطاعته، وإذا غاب عنها حفظته.... رواه أبو داود والحاكم وقال: حديث صحيح الإسناد.
تعليقات
إرسال تعليق